隨住年齡增長，唔少男士都可能會遇上脫髮更甚至禿頭危機，不過只要唔係甩到好似埼玉老師咁完全光頭，都可以呃下人（同自己）只係天生髮線高，反正高唔高冇一個客觀標準。不過，最近就有間日本公司做咗項調查，喺日本47個都道府縣各抽取100位市民，訪問佢哋覺得髮線幾高先叫做「頭髮稀少」，結果顯示日本人認為眉毛至髮線距離7cm或以上就係「頭髮稀少」。睇緊呢篇文嘅你，係咪已經急不及待搵把間尺出嚟度下呢？

（圖片截自：dime.jp）

早前日本公司「アンファーAngfa」進行一項名為「頭髮稀少界線（薄毛の境界線）」調查，喺全國47個都道府縣各抽取100人，合共4,700人，男女比例各半，年齡介乎於20-69歲，訪問佢哋覺得髮線幾高先叫做「頭髮稀少（薄毛）」，統計結果顯示只要眉毛至髮線距離7cm或以上就視為「頭髮稀少」。

從上述數據可以睇到，雖然最多人（33%）覺得「7cm」係分界點，但其實都有唔少人（32.3%）覺得「6cm」就係分界點，所以未到「7cm」就朋友都唔使咁興奮，因為你係唔少日本人眼中都係「頭髮稀少」。

如果從性別劃分嘅話就會得出一個驚人結果，以4-5cm呢個範圍為例，竟然31%男性認為闊過4-5cm已經叫做「頭髮稀少」，可以見到男人對「頭髮稀少」嘅定義比起女性嚴格得多。

資料來源：dime.jp