經歷多番波折嘅日本東京奧運會，即將於下個月23日正式開幕，目前主辦單位正密鑼緊鼓彩排開幕禮，而一眾網友就紛紛猜測到時會播咩音樂，由偶像團體估到去J-pop，更甚各首為人熟悉嘅ACG歌曲。最近有網友經過主場館嗰陣，就聽到場內播出國民級RPG《勇者鬥惡龍》嘅序曲，另外又有人表示聽到《EVA》劇場版插曲，唔知到時會播咩歌呢！如果會播《EVA》主題曲「殘酷天使的行動綱領」相信會非常之爆。

.@Tokyo2020 here we come! #RioToTokyo pic.twitter.com/cyidw24TVr

— Olympic Channel (@olympicchannel) August 22, 2016

日本身為ACG大國，從來唔抗拒將自家嘅動漫電玩文化輸出到全世界，喺2016年巴西里約熱內盧奧運閉禮期間，時任日本首相安倍晉三就扮過孖寶兄弟，象徵住日本將會接力舉行下屆奧運。雖然佢之後透露過覺得首相扮孖寶兄弟好似唔太適合，同埋去巴西要坐20個鐘飛機好辛苦，但最後佢都係照做，仲贏得唔少掌聲。估計今次日本唔會放棄奧運呢個大好機會向全世界推廣ACG文化，相信喺開幕及閉幕禮都會加入唔少動漫電玩元素。

6/27 #高橋由美子 日本青年館ホールライブの帰りに #国立競技場 通ったら #ドラクエ のテーマが漏れてた…
リオ五輪閉会式の #マリオ に続いてサブカルゲームコーナーがあるのか東京オリンピック開会式????️#Tokyo2020 #オリンピック pic.twitter.com/pswBAjfkbn

— 新橋テツロウ(偽じゃんけんマスター) (@a_la_nozo) June 28, 2021

最近有日本網友經過主場館嗰陣就聽到《勇者鬥惡龍》嘅序曲（條片有啲細聲），而《日刊ゲンダイ》記者就表示聽到70年代經典歌曲《翼をください（給我一雙翅膀）》。

由鄉村音樂團體「赤い鳥」於1971年發行嘅《翼をください》，憑住清澈嗓音獲得大眾廣為傳頌，同時亦被多間學校收錄成必教歌曲之一，所以大部份日本國民都識得呢隻歌。起初隻歌同動漫都扯唔上半點關係，但因為2009年上映嘅《福音戰士新劇場版：破》曾經翻唱過呢隻經典金曲，令隻歌增添咗份動漫色彩。

當然目前都只係估估下，或者到時開幕禮一隻ACG相關嘅歌都唔播呢！流行文化歌曲仲有AKB、嵐、安室奈美惠、宇多田光等等N個選擇，一切等到7月23日就正式揭曉。