貴價生果近年越黎越多，其中日本空運嘅就更加係貴上加貴，就好似之前成千幾蚊個嘅「四角西瓜」。不過正所謂長江後浪推前浪，近日日本又出現一款「天價」生果，真係破晒紀錄。

由日本青森縣研發嘅知名車厘子品種「JUNO HEART」，近日就推出該種類最高級別品牌「青森心跳」，並於青森縣八戶市嘅中央批發市場進行拍賣會。

呢款「JUNO HEART」最高級別車厘子，一盒只有15粒，但粒粒都大到爆，差唔多係你平時見到嘅兩倍咁大。而喺呢次拍賣會中，就成功以每盒45萬日元拍賣出，並一共出售39箱之多！除番開，即係一粒車厘子竟然要價高達30000日元，亦即係大約2000蚊港紙一粒！

而成功投得呢批高級車厘子嘅人士，係長塚青果社社長長塚京子，佢大讚呢種車厘子好似紅寶石咁靚，但係真係放落口一啖就無左...

所以幾時都話，有錢就係任性。