近年美國車廠Ford積極電動化，首款純電動SUV Mach-E亦相當受歡迎，不過有唔少車主就表示揸得電動車多，就開始懷念燃油車個種汽油味，於是Ford就研發一款名為「Mach-Eau」特製香水，令電動車主可以享受汽油所帶嚟嘅嗅覺衝擊。

Ford Mustang Mach-E（圖片截自：Ford）

Mach-E自推出以嚟備受歡迎，今年銷量甚至超過Ford燃油跑車，不過佢哋調查發現竟然有20%人改揸電動車後，都表示「忘不了」燃油車個種汽油味，另外亦有70%車主表示佢咃喺某種程度上都懷念汽油味。為咗回應車主需求，Ford最近喺英國舉行嘅「Goodwood Festival of Speed」嘉年華展示一款名為「Mach-Eau」嘅香水，聲稱聞起上嚟唔單只似汽油，更融合煙燻、橡膠、甚至「動物」元素，香水樽設計亦參考咗加油機造型。

據了解，呢款香水由英國著名香水顧問公司「Olfiction」操刀，經調香師深入研究車上各種特殊氣味後，調配出含有汽車內飾嘅杏仁氣味（苯甲醛）、車呔橡膠味（對甲酚）嘅香水，再加入薰衣草、天竺葵、檀香、藍薑等天然物料，藉此還原汽油車嘅「濃郁」氣味。可惜嘅係，呢款香水只係嘉年華期間限定商品，目前Ford未有規劃量產發售，不過都唔排除反應好嘅話，Ford真係會推出市面。