奧運啱啱完，黎緊英超又開鑼，相信各位足球迷都已經準備就緒。不過據英國《Sky Sports》最新發表嘅調查發現，英國嘅足球迷文化近年有大轉變，所謂「One Life One Club」嘅球迷比例其實不足三份一，取而代之嘅係另外四種球迷形態，當中更有人係在意球星們對社會嘅影響，多於其在場上嘅表現。

據《Sky Sports》主辦嘅「Football Fandom 2021」調查指，所謂「傳統球迷」，報告稱為「Lifer」嘅球迷其實只佔大約三份一，而其餘球迷則能夠分成著重賽事數據、醉心Fantasy Football嘅「Statto」、著重足球「週邊」，例如時裝、音樂、髮型等嘅「Expressionist」、以睇波作為社交聯誼嘅「Socialiser」、及因為球星為社區問題發聲而支持嘅「Game Changer」。

近年唔少英超球星都積極參與各種慈善、社區活動，例如致力解決英國兒童飢餓問題、甚至推動英國政府改變政策嘅曼聯球星Marcus Rashford ，以及致力推動種族平權嘅曼城前鋒Raheem Sterling等。報告亦指近七成英國球迷認為球星們有推動國內種族平權、63%人認為對足球嘅熱愛令佢哋對社會、經濟議題更有認識。

資料來源：Sky Sport - Football Fandom 2021