近日佐敦德成街嘅日本文化氣息好強，除左因為有日式新樓盤登場之外，仲有一間日式摩登居酒屋「hare晴舍」試業，坐喺個度令人感覺好似置身日本六本木嘅居酒屋一樣，係無得去旅行嘅日子又一好選擇。

餐廳以日式裝修為主，晏就時間採光度十足，晚上則另有居酒屋嘅風味。餐牌上選擇極多，由刺身串燒到定食、Sake、本地手工啤、蛋糕等，一定有野岩你食。

「hare 晴舍」由專業咖啡師Reeves以及唎酒師Dennis共同創立，因此可以話午市及晚市風格各有不同，星期六日晏就歎杯咖啡感覺文青，平日晚上放工則可以飲番幾杯，享受放鬆嘅時刻。

hare嘅咖啡由冷泡、冰滴、虹吸、手沖到拉花咖啡也一應俱全，甚至仲可以品嘗到源自日本嘅松屋式手沖咖啡，係一種獨有嘅咖啡風味。由於負責人自設炒豆工房，所以無論邊一款咖啡佢都可以自行製作。

而清酒sake方面亦可以話係hare嘅靈魂，單係款式竟然有超過20款，喺香港咁多選擇係絕對唔常見的。當日負責人Dennis特別拎左支三井之壽Sake出黎，實在驚喜，原來係《男兒當入樽》作者井上雄彥特別為呢個牌子設計的特別版。

除左咖啡同清酒，近年大行其道嘅本地嘅精釀啤酒喺餐廳亦都可以搵得到，好似Heroes、Carbon Bews、大圍啤、少爺啤等，具負責人表示佢地會不定期更換牌子，比客人可以有更多選擇同體驗。

而串燒可以話係呢度必試嘅食物，包括牛舌芯、十勝豚里脊、薩摩赤雞心、雞肝、雞腎、雞皮蝦、廣島蠔、白鱔等，每一款都燒得剛剛好，而原來佢地嘅串燒爐係從日本訂製番黎嘅頂級貨，唔怪得燒出黎咁有日本風味啦。

另外值得一提嘅係，hare特別引入本地茶館「茶家Teakha」嘅手工蛋糕，喺九龍區就只此一間可以食得到。