中式酒通常都係會諗到「養命酒」，或用黎煮餸嘅花雕酒又或者係跌打酒，基本上好少人會諗到直接飲用。而全新初創品牌「五味雜陳」就宣布推出以傳統藥材浸泡酒為靈感，研發出兩款中式草本力嬌酒。

兩款酒分別叫做「五味雜陳」及「閉月羞花」，都係以天然中式草本浸泡而成，同時不失洋酒味道，令人驚喜。

「五味雜陳」聯合創辦人、調酒師麥啟明Dennis就表示：「屋企有一埕浸左20幾年嘅藥酒，屬於被遺忘嘅傳統，覺得失傳左就實在太可惜。我地於是以西方調酒概念，配合味道、香氣、功效俱佳嘅優質中式草本，調配出適合隨時跟朋友分享嘅草本浸泡酒，令呢種傳統成為現代生活嘅一部份。」

「五味雜陳」推出嘅力嬌酒，係一種喺烈酒基礎上再添加草本、香料、花果、堅果等味道而成嘅酒，通常酒體濃稠而且帶甜味或苦味，而由於製作過程中將草本嘅功效濃縮，因此可舒緩各重身體不適，又具幫助消化等功效。你可以話佢係雞尾酒嘅先驅，又或者係一種「藥酒」都得，同時佢都係一種生活享受嘅來源。

酒方面Dennis當然落足心機調配，但係佢地亦都為個酒樽花左唔少心思，一個非常典雅嘅酒機，你唔飲放喺度都可以作為一個裝飾品存在，呢啲咪就係Lifestyle囉。