Blue Origin火箭「New Shepard」經常被笑似陽具。（圖片截自：Blue Origin）

自Blue Origin火箭「New Shepard」問世開始，就因為外型似足陽具而被網民瘋狂抽水，後來Jeff Bezos用佢完成首次太空旅行，更令火箭人氣有增無減。最近有美國廠商就睇準商機，趁機推出「New Shepard」 1/66比例模型，除咗可以當作擺設之外，仲可以真正射上天。

呢款得意之作由美國火箭模型公司Estes Rockets聯同Blue Origin攜手製作，旨在透過模型令孩子們認識太空科技及歷史。據官方介紹，模型長26.3cm、直徑為4.52cm、重約113g，透過官方嘅專用發射台同燃料，就可以將模型射上122米高空。而且模型設計同真個支「New Shepard」一樣分成兩級，升空後返回艙會同推進器分離並展開降落傘，再慢慢降落返地面。

「Estes New Shepard 1/66」模型單支售價為69.99美元（約$545港幣），如果想射上天嘅話，可以考慮109.99美元（約$856港幣）入門套裝，入面包埋發射台、發射控制器以及三支一次性發射引擎，如果想重複射多幾次就要另外加購引擎，11月1日起於官網開放訂購。