一般黎講，LEGO都會被歸類係玩具，如果屋企放滿LEGO嘅話，亦會有一種「大細路」嘅感覺。咁如果你真係好鍾意LEGO，但又想走成熟男人路線可以點做？答案可能就係Room Copenhagen最新推出嘅「LEGO Home - Wooden Collection」啦。

睇個名就知佢來自丹麥嘅Room Copenhagen，以推出獲LEGO授權嘅家品而廣為人知，過往推出嘅大都係如正常LEGO磚一樣色彩鮮艷、塑膠製成嘅收納家品。最新推出嘅「Wooden Collection」雖然繼續係以LEGO磚為靈感，但就用上森林管理委員會 (FSC) 認證嘅橡木，令其變成兼具童趣與質感嘅成熟風家品。如果你好鍾意LEGO同「北歐風」，應該就會好鍾意啦。

系列產品包括2x2及2x4，可以如LEGO一樣疊起嘅小抽屜、1x6嘅牆架、1x4嘅相架，以及單粒嘅掛勾。每款亦有原木色以及較深沉嘅胡桃木色，目前未公佈幾時開售及售價。

資料來源：The Brick Fan