一直坐落於金鐘太古廣場20多年的泰國餐廳THAI BASIL，於今年8月搬到 L1 樓層，無論內外都為食客們呈現全新面貌，唯獨不變的就是食品的高品質。

為迎接 THAI BASIL 重新開幕，餐廳於菜單特別加入多款全新泰北菜式，同時亦保留過去深受歡迎嘅經典菜式。泰北菜式一向以其鮮明香料配搭、酸辣醒胃嘅獨特味道，令一眾食客留下深刻印象。今次新推出嘅菜式就包括燒茄子青蘋果沙律、冬蔭蜆湯、香茅香草炒泰式滷水豬手、燒原個椰菜花配青咖喱及椰子三式等，絕對係風味十足、清新惹味！

唔單止係食品，植根香港多年嘅THAI BASIL亦渴望肩負起更多社會責任，所以特意於新店與太古地產攜手合作，推行「綠色廚房（Green Kitchen）」計劃，致力將綠色元素融匯於設計概念及日常營運之中，從節約能源及用水，到改善店內通風系統及廚餘管理等環節，目標都係希望達至可持續發展。 

不過說到尾，餐廳最重要嘅都係食品質素，而小篇我就親身幫你試過，確實係非常唔錯，特別係慢煮加拿大牛肋骨紅咖喱 ($288)，如果你係牛肉愛好者，呢一道菜絕對係高質，其牛肋骨肉質嫩滑，配合咖喱嘅香濃，實在係絕配。另外，先將椰菜花沾上青咖喱汁後配合蒜蓉等配料慢燒兩個半小時嘅燒原個椰菜花配青咖喱 ($138)，又香又清新，絕對係美味與健康之選。

食得泰國餐，當然你點都要食得少少辣，但如果你真係搞唔掂的話，叫杯甜嘢解解辣，而餐廳特別推介呢款Dark Green($45)，將甜、酸、甘味集一身嘅特色飲品，以泰式綠茶作為基調，加入清香撲鼻嘅海南島香水檸檬肉，香甜中帶點微澀，相當有驚喜，亦同時能達到解辣的作用。 

而不得不提嘅仲有燒加拿大帶子喇沙 ($158)，廚師特別減輕湯嘅辣度以突出其椰香，湯底絕對係濃郁一流！

鍾意食甜品嘅你亦絕對不能錯過餐廳自家製嘅咖椰蛋撻，可以話係外脆內軟，當中內裡嘅蛋芯有住香綿咖椰醬，香甜軟滑，係你必試嘅選擇。