自從迪士尼於今年4月宣布將旗下FOX Sports多條電視頻道撤出東南亞市場，唔少車迷都非常擔心冇得睇後半季嘅激烈F1賽事。不過Now TV早喺9月開始接手直播，並喺今日宣布已同Formula 1達成協議，取得2021及2022年度世界一級方程式錦標賽（F1）直播權。

（圖片截自：formula1.com）

今季賽事鬥得相當激烈，韋斯塔及咸美頓喺積分榜上叮噹馬頭，可能要鬥到最後一刻先知道冠軍花落誰家！各位車迷亦唔使再擔心FOX Sports停播要自己搵方法睇F1，事關原本轉播FOX Sports嘅Now TV已取得直播權，有關節目將於Now Sports Plus（頻道680）播出，並提供粵語及英語評述，不過就未知係咪由大家熟悉嘅陳恩能（丹尼爾）擔任。

現有及全新Now TV客戶，只需申請指定體育組合或Now Sports Plus組合，即可收睇世界一級方程式錦標賽（F1），而Now Sports Plus頻道亦將於Now E播放，官方將稍後公布詳細。