Fly唔到To the Moon EVA登月失敗

文：MenClub 魏文青　　圖：互聯網
POSTED ON 09 Apr 2015

假如未來人類再上月球，會發現到啲咩？可能會發現當年阿波羅11號插落去支美國國旗，可能會發現岩士唐個「我的一小步，人類的一大步」腳印，甚至真係發現月球背面有外星人基地！但有一樣嘢係一定見唔到，就係之前話為咗慶祝《EVA》廿週年之集資插上月球嘅「朗基努斯之槍」！點解？因為儲唔夠錢囉！

大拿拿一億Yen喎(約660萬港元)，你估真係咁易集資咩！雖然整個集資計劃由1月30日開始，用咗短短38日就籌到3538萬Yen，創下日本本土最快而且最大的群眾集資數字，但接住落黎嘅時間幾乎毫無進展，就算又賣刀又盛，去到截止日期前3日(即4月2日)都只係籌到4000萬Yen(約258萬港元)。最後三日就算開放埋比外國Fans投資，到4月5日夜晚11點截數之時，總共都係籌到5469.5萬Yen(約350萬港元)，即係啱啱過半。

換言之，以「Fly me to the moon」做結尾音樂嘅EVA，最後都Fly唔到To the moon嚕！