相信係人都唔想自己私隱被侵犯，而我地偉大嘅中國政府就梗係唔會侵犯人民私隱啦，近日就更加加強唔會咁做嘅決心，並要求一眾龍頭科技公司簽協議。

據內地媒體最新報導，內地一眾龍頭科技公司，包括騰訊、華為等近日就參加左由深圳市委網信辦聯合深圳市公安局、市市場監管局、市通管局主辦嘅深圳市 APP 個人信息共護大會，期間一眾公司都簽署左一份承諾書 -《深圳市 APP 個人信息保護自律承諾書》，亦即係表示「不濫用人臉識別數據，不監聽個人隱私」等嘅承諾咁話。

我個人就實信嘅，你唔係唔信呀? 不過其實本身都唔會咁做，做咩無啦啦要簽份咁嘅協議書先?

簽左呢份協議，亦代表呢啲公司將嚴格遵守國家各項法律法規，自覺主動踐行自律承諾，積極推動行業自律，帶動引領全市互聯網企業加強個人信息保護，充分保障用戶合法權益，並向社會公開作出「不超範圍采集信息，不強制索要用戶授權，不利用大數據殺熟、不濫用人臉識別數據，不監聽個人隱私」等等嘅承諾。

今次深圳市委網信辦就希望各龍頭公司可以「言必信、行必果」，將承諾實際做出來，以確保市民嘅個人訊息及私隱得到保護。

多謝國家對市民咁好呀！