相信大家細個都俾父母鬧過打機有損身心，影響學業。原因無他嘅，對於未打過機嘅人，見到你望住個Mon坐定定玩足幾個鐘，甚至有時玩到太過肉緊會大叫，自不然覺得遊戲係電子鴉片壞眼兼壞腦。但打過機嘅朋友都知道，電子遊戲除咗係娛樂，仲可以訓練到記憶力、資源管理、空間感等能力。最近有日媒就訪問多位東京大學學生，選出12款有趣又能夠訓練思維嘅遊戲，唔知大家玩過幾多隻呢？

既然係小朋友都會打機，家長們自然想仔女玩隻訓練到思維嘅遊戲，所以日本家庭教育雜誌《President Family》就去到全日本首屈一指嘅東京大學訪問咗249位學生，最終選出12款有趣又適合「學習」嘅遊戲，完整名單如下：

1.寵物小精靈系列

2.桃太郎電鐵系列

3.Minecraft

4.雷頓教授系列

5.動物森友會

6.天穗之咲稻姬

7.語言解謎文字拼詞

8.踩地雷

9.模擬城市系列

10.Candy Crush

11.閃電十一人系列

12.Koei歷史遊戲系列（信長之野望系列、三國志系列、大航海時代系列）

根據東京大學學生們講法，以上遊戲除咗有趣，仲可以訓練記憶力、策略、資源管理、批判思維以及解難能力，有時仲會用到課堂上所學到嘅知識，從而深化記憶。就例如桃鐵系列可以了解到日本地理，寵物小精靈要學識計算傷害，確保可以擊敗對手，Minecraft可以訓練空間感同創造力，雷頓教授嘅解謎遊戲可以訓練解難能力，模擬城市學習資源管理等等。

可能唔少機迷見到個排行榜都會有異議，認為《Sid Meier's Civilization》、《Age of Empires》、《Portal》、《Oxygen Not Included》...... x N 等等，應該要上榜，但考慮到受訪者係日本人，榜上咁多款日系遊戲都好合理嘅。唔知大家又覺得咩遊戲有趣得嚟又可以訓練到思維呢？

資料來源：President Family