而家因為疫情成日無得去旅行，無得去香港人最愛嘅日本，都知大家辛苦，所以將日本嘅風貌帶黎香港可能係唯一一個消除你「思鄉之情」嘅方法。

近日，日本著名啤酒品牌Asahi就聯同著名日式餐廳ZUMA，合力為市民帶來令你感覺置身於日本橫丁嘅體驗。

橫丁指嘅係日本主要城市街道外嘅隱蔽小巷所擠滿嘅小型獨立居酒屋、酒吧以及餐館，呢啲小巷喺東京及大阪等大城市最常見，亦係日本夜生活文化其中一個最具標誌性嘅地方。

處於橫丁，當然唔少得啤酒、清酒、串燒等美酒佳餚啦，而今次呢個期間限定Pop-Up，你就可以試下Asahi智能自動斟酒機倒出來嘅Asahi Super Dry，其啤酒與泡沫為黃金比例7:3，絕對能令你體驗最好嘅啤酒口感。

除左食嘢，咁就當然唔少得打下卡啦，現場佈置到令你猶如置身日本橫丁，好似楓樹、昏暗嘅紅燈籠、霓虹燈、東京自行車裝人飾，雖然就真係唔係日本黎架啦，但希望可以幫你頂住癮先啦！