荷里活巨星里安納度狄卡比奧（Leonardo DiCaprio）自出道以嚟就備受矚目，但佢從來冇因此而自滿，歷年試盡各種戲路突破自我，演過羅密歐、畫家、飛機師、精神病人、盜夢者、富豪、股票經紀、毛皮獵人...等等，睇嚟佢好快又會多一個「身份」。最近外媒Deadline透露，美高梅（MGM）正計劃開拍一部以70年代邪教組織「人民聖殿教」教主Jim Jones為題嘅同名電影，並邀請里安納度出演。

人民聖殿教教主Jim Jones

自稱係釋迦牟尼、耶穌基督、列寧轉世嘅Jim Jones於1955年創立「人民聖殿教（Peoples Temple）」，起初組織因為設立免費食堂、批兒所以及老人院，積極幫助窮人而略有名聲，之不過直到70年代開始走偏，教主Jim Jones公開拒絕傳統基督教義並自稱為上帝，然後又以建立一個冇邪惡嘅天堂為由，帶領上千名信徒到南美洲圭亞那（Guyana），興建一個自給自足嘅農業型人民公社「瓊斯城（Jonestown）」。由於當時接二連三爆出教會斂財、虐待、假裝神蹟等醜聞，最後Jim Jones威脅信徒們飲用含有氰化物嘅果汁同佢同歸於盡，造成918人集體喪命。

Scott Rosenberg

據報導所指，目前MGM同里安納度嘅談判已步入最後階段，除咗佢本人會主演之外，佢旗下嘅製作公司「亞壁古道影業」亦會參與。另有傳MGM用上七位數酬金（美金）聘請《Venom（毒魔）》編劇Scott Rosenberg擔任監製兼撰寫劇本。唔知各位又期唔期待里安納度出演啲咁高難度嘅角色呢？