香港人最鐘意去日本旅行，但好多時大家都只係跟住啲旅遊書、旅遊網站介紹咁去，而忽略咗一啲當地人先知嘅景點、知識。好似近日有位住喺日本北海道嘅Twitter網民就發文，呼籲大家如果喺北海道見到以下呢堆粉筆字就要小心，你又知唔知點解？

北海道、これが「ヒグマ危険」という意味の書き置きですので旅行中の方は気をつけてくださいね… pic.twitter.com/rBYM3ix5bl

— 日報さん (@nippou_) October 20, 2021

呢張圖係由Twitter用家 「日報さん (@nippou_)」發佈，據佢所講，呢啲粉筆字係會「隨機地」出現喺北海道嘅路上，如果大家見到就要小心。照字面去解，其實佢就係寫住「10月17日，呢度有屎」。咁當然條路有屎都的確係需要小心，亦有人估可能係塗鴉，有位來自大阪嘅網民亦分享，如果喺大阪有人放狗又唔執屎，有時都會出現類似嘅「Passive Aggressive」標誌。

東北棕熊

圖片：Wikipedia

不過據「@nippou_」解釋，北海道路上會出現呢堆字，雖然真係解「有屎」，但就唔係普通屎，而係熊嘅屎。卻說北海道係有野生嘅東北棕熊棲息，而呢啲可達400公斤嘅龐然大物亦有襲擊人類嘅可能 (詳情請去睇《黃金神威》)，所以如果喺有人煙嘅地方附近發現熊便便，當地人就會特登標記出黎，提醒行人此處曾經有熊出沒。所以如果大家去北海道時見到類似嘅字，就要打醒12分精神啦——不過大家去到日本睇黎都係下年，你哋記得至算啦。

資料來源：日報さん (@nippou_)