各位自問打《Fifa》有返咁上下，又希望代表香港出戰嘅機迷要留意啦，今日香港足總與香港電競總會就宣佈會於11月尾舉行「香港電競足球代表隊 2022選拔賽」，勝出者將有機會代表香港參加「FIFAe Nations Cup 2022」及「2022年杭州亞運會」兩項大型電競賽事！

去年足總及電競總會亦曾舉辦同類型選拔賽，選出五位優勝者代表香港參加「FIFAe Nations Series 2021」，最終奪得36名。今年嘅選拔賽同樣係為選出「FIFAe Nations Series 2022」代表隊而設，但因為明年仲有杭州亞運，而《FIFA》就會加入成為電競項目之一，令今次代表隊選拔賽嘅含金量更高。

選拔賽將於黎緊11月15日至22日起接受報名，只要年滿16歲又持有香港護照及身份證就能夠參加，另外由於比賽會於PS4平台上舉行，所以大家都需要自備PS4同PSN帳號。成功入圍嘅512強將於11月25及26日進行為期兩日、每日最多三場嘅單場淘汰線上賽，連贏六場之後就晉級8強。

而8強賽事將於12月3日，於旺角CGA 香港電競館以線下賽型式舉行，冠、亞、季軍將瓜分總共3萬元 (分別為$1.5萬、$8,000、$5,000)嘅獎金獎品，但更重要嘅係包括冠、亞、季等五人將會成為香港代表隊成員，有機會代表香港參加「FIFAe Nations Cup 2022」及「2022年杭州亞運會」。

有興趣嘅大家可以去CGA網頁報名，又或者去足總網頁瀏覽賽制等詳情。