唔經唔覺又到年尾，係時候回顧一下過去一年有咩熱門話題！Google喺今日就公布咗香港區年度熱搜榜，反映大家呢一年嚟最關心嘅話題，其中「消費券登記」成為熱搜關鍵字及熱搜本地頭條榜首，而人氣爆燈嘅MIRROR就攻佔本地娛樂名人榜前三甲。

從熱搜關鍵字排行榜可以反映，除咗「消費券登記」以及同疫情相關嘅「疫苗預約」、「安心出行」、「疫苗抽獎」之外，大家對今年奧運特別投入，不斷搜尋香港運動員相關資訊及比賽日程，因此「奧運」、「何詩蓓」、「 張家朗」、「李慧詩」等關鍵字都榜上有名。

本地娛樂名人及話題人物方面，可以見到更多香港運動員嘅名字，而因為舉行百萬拳賽而掀起話題嘅林作及鍾培生亦成功殺入本地話題人物榜第9位。至於本地娛樂名人榜，毫無懸念由MIRROR包攬前三甲，而飾演《梅艷芳》嘅王丹妮亦係短時間內攀升至第4名，可見全城非常關注《梅艷芳》呢部電影。值得一提嘅係「光纖之父」高錕，事關Google早前曾製作動畫Doodle紀念佢對互聯網發展嘅貢獻，所以登上話題人物第4位。

正所謂好事不出門，壞事傳千里，從國際娛樂名人及話題人物熱搜榜可以見到，頭幾位嘅「彭帥」、「李雲迪」、「吳亦凡」都係因為陷入醜聞而榜上有名，其中彭帥同張高麗嘅性醜聞更係11月份先曝光，短短1個多月就成為榜首，睇嚟大家都好關注事情發展。

其他類別嘅排行榜如下：