喺過去「打機」只係娛樂活動，而黎到今時今日「打機」已經職業化，並搖身一變成為「電競」。而電競如今仍只屬發展階段，背後相信仲有無限商機，而視「電競」為職業嘅年輕人已經越來越多，因此全新嘅教育學科亦因而誕生。

據最新消息指，日本東京澀谷即將有一間電競高中 Esport High School誕生，預計呢間高中將於2022年1月正式開學。據報 Esport High School 係由日本電信公司NTT及東京綠茵足球隊旗下電競戰隊支助開辦的，屆時當中嘅老師將會係一班退役電競選手及相關人員。

而入讀嘅學生，當然要配備高等設備先會有最佳嘅學習啦，所以佢地將可以使用配備i7-11700及Nvidia GeForce RTX 3070 嘅 Galleria XA7C-R37 電腦，相信學習嘅時候一定非常流暢。

不過目前呢間高中嘅課程並未正式公佈，據指會有包括第一及第三視角嘅射擊遊戲、策略遊戲、MOBA等嘅嘅教學，而正常嘅高中課程亦會同時兼具。

另外，該課將除了提供電競課程外，亦會有主播、VR創作者、遊戲設計師、特效設計師、程式員等嘅課程供學生選擇。

其實能夠讓學生從高中就選擇自己嘅興趣繼續發展，實在係非常開明嘅做法，學生能夠寓學習於興趣，實在係幸福！