相信大家都一定有玩過扭計骰 (Rubik's Cube)，呢個3 x 3六面不同顏色嘅立方體自1980年面世以來就難倒唔少人，不過隨住技術發展，近年嘅世界比賽上已經出現四秒內扭完一個嘅紀錄。而為咗畀啲新挑戰大家，日本Megahouse就推出號稱「史上最難」嘅新版扭計骰「Rubik's Cube Impossible」！

驟眼睇，「Rubik's Cube Impossible」嘅外觀同普通扭計骰冇咩唔同，而且只係最普通嘅3x3大小，理應唔會特別難玩。但佢就巧妙在骰面上嘅顏色塊，喺唔同角度望埋去，係會睇到唔同色，而且仲好陰濕咁設計成「某個角度睇落去，唔同色嘅色塊會變得非常近似」，換言之佢唔只係搞亂你，仲會誤導你。而當你辨別色塊本身係咩色都有難度嘅時候，要將佢扭回原狀就變得非常困難。

日本電視節目近來就報導咗呢個新玩意，仲搵黎2011年扭計骰世界冠軍、能夠穩定地於10秒內完成正常扭計骰嘅伏見有史試玩。伏見有史一開始話自己有信心於兩分鐘內完成，但結果用咗近一個鐘先扭完一面，最後更加決定放棄。佢話新版嘅難度在於，喺某啲角度下睇，會有超過10格係同一個顏色，所以根本就唔知邊一格先係真正要扭嘅目標，亦唔知自己究竟有冇扭得啱。難怪Megahouse方面聲稱呢個新版係「扭亂咗就無法回到原狀」。唔知大家又有冇興趣用3,070Yen (約HK$210) 買個返黎挑戰下呢？

資料來源：Megahouse