自從《Elden Ring》推出之後，相信每分每秒都有唔少玩家死於「英高 (遊戲創作人宮崎英高) 的惡意」之上，但有時「英高嘅惡意」都可以成為正義嘅利劍，仲可以救大家一命！

卻說外國玩家「Ray69Rage」日前與朋友一齊攻略緊《Elden Ring》中嘅卡里亞城寨，點知就遇上其他玩家「入侵」，「Ray69Rage」與友人本來諗住用「擬態」扮成普通物品避戰，等對方遠離後就繼續攻略，誰知一解除擬態就與對方兜口兜面撞到正，二人唯有迎戰，但隨即就發現無論點樣打，對方都唔會扣血，似乎係利用外掛鎖血。朋友見勢頭不對，就立即叫Ray69Rage快啲搵到該區Boss房，因為一旦擊殺該區Boss就會中止所有連線遊玩，於是唔識路嘅Ray69Rage就展開大逃亡，而入侵者亦緊隨其後。

Ray69Rage於地圖中不停亂跑，去到某座升降機門前時，朋友提議可以搭升降機上去，而呢個時候就係「英高的惡意」出現嘅時候。於《Elden Ring》 (以及所有《魂》系遊戲)中，絕大部份升降機升咗上去之後，原地係會有一個大窿，玩家唔小心跌落去就會即死，玩家需要拉下附近嘅把手，部升降機先會落返黎，而又由於《Elden Ring》唔少場景都係黑媽媽、加上視角問題，相信唔少玩家都曾經因此跌死過。而Ray69Rage面前嘅呢部升降機就係已經升咗上去、地下得返一個大窿嘅狀態，就連Ray69Rage本人入去時都差啲跌死，誰知「惡意」之前人人平等，緊隨其後嘅外掛入侵者收掣不及，直衝大窿中跌死，外掛鎖血都抵擋唔到「英高的惡意」。事後Ray69Rage與朋友都暢懷大笑，直指「罪有應得」！