你班麻甩佬冷靜啲先，唔好見到「內衣」兩個字就滿腦子奇怪思想咁衝入黎諗住有嘢睇。其實件事係咁嘅，日前日本東京都教育委員會就宣佈正式廢除一系列「自古以來」就存在、但依家已經不合時宜嘅陳舊校規，當中就包括廢除「限制內衣顏色」、一定要黑頭髮、以及禁止某啲髮型等等。

睇到呢到你可能會覺得，嘩咁啲日本學生咪可以染到個頭鬼五馬六、著啲Bra又可以五顏六色？咁你就錯啦！因為仔細去睇佢嘅新規定，就會發現佢嘅目的係為咗方便學生們。例如目前部份東京高中嘅校規，係寫明學生「頭髮必須係純黑色」，亦即係如果你天生啲頭髮就唔係純黑色，你係要去染返佢做純黑色；而喺新規定下，本身係黑頭髮嘅人依然唔可以染頭，但本身唔係黑頭髮嘅人，亦唔需要染黑，免卻咗些少麻煩。順帶一提，委員會同時仲廢除咗「禁止Two Block髮型 (即係兩邊剷短頭頂留長)」嘅規定。

而所謂嘅「不限內衣顏色」，本來係為防止學生件內衣透出黎，所以要求佢哋著統一顏色嘅內衣 (通常係白色)，而有要求就自然有檢查，而大家稍為想像下都可以估到，不論男女，要畀老師檢查內衣顏色係一件幾唔聚財嘅事。而新規定就以邏輯為依據：既然問題嘅本質係唔想學生件內衣透出黎，咁只要佢唔透，實際上件內衣係咩顏色都冇所謂啦？咁如果透出黎就違反校規，大家就唔使特登去Check啦？當然，考慮到中學校服巳嘅上衣大部份都係白色「的確涼」質地，實際上應該都係白色或米白色嘅內衣之類先會合格。

更值得一提嘅係，委員會有公佈受新規定影響嘅市立高中數目，其實成個東京都加埋都只係得嗰十令廿間，換言之絕大部份學校、學生本來就唔使遵守呢啲陳舊校規。所以大家唔好以為「嘩黎緊去日本，睇啲學生妹一定更加正啦！」——況且，你去到日本先講啦。