玻璃樽裝可樂自上年年中停產後，如今終於以全新面貌回歸！新設計將會更環保、更輕身、容量更高，鍾意玻璃裝嗰種多氣泡口感嘅朋友今次有口福喇。

新玻璃樽裝「可口可樂」同「無糖可口可樂」保留咗經典弧形曲線造型，驟眼睇同舊版並冇太大分別，不過樽上嘅Logo唔係用白油印上，而係改用類似膠樽版嘅招紙。至於可口可樂公司旗下其他品牌，包括「雪碧」、「芬達」、「玉泉」等等就採用另一款玻璃樽。另打，今次仲加入咗玻璃樽裝版本嘅「紅茶花伝」檸檬茶及蜜桃茶，未來亦會有更多品牌加入系列。

據官方表示，由於新樽以60%再生玻璃物料製成，所以重量比舊樽平均輕大約3分之1（輕33%），容量亦由192ml提升至250ml，而每箱亦會由24支變成12支，方便運輸及儲存。新玻璃樽裝由即日起將陸續登陸各大餐廳食肆、士多及部份便利店，大家亦可以喺可口可樂網店直接訂購，有興趣嘅朋友敬請留意。