Johnny Depp控告前妻Amber Heard誹謗並要求5000萬美金賠償案繼續開審，Johnny Depp於香港時間今早繼續作供。今次就講到當年Amber Heard於報章上發表文章，不指名地控訴自己遭受家暴後，Johnny Depp失去《Pirates of The Caribbean》中Jack Sparrow一角嘅過程。而令影迷感到哀傷嘅，係Johnny Depp於庭上作供指，當年佢係打算繼續出演Jack Sparrow一角，並希望角色可以好好向觀眾道別、系列可以好頭好尾咁完結。

圖片：IMDB

縱然日前Johnny Depp曾經於庭上作供，指就算依家Disney「拎住3億現金加100萬隻羊駝」，佢都唔會繼續出演《Pirates》系列電影，但今日佢就於庭上表示，於Amber Heard家暴文章於2018年見街時，佢其實係希望拍系列第六集，「一個系列嘅壽命有限，而要完結一個咁樣嘅系列其實都有方法。我覺得角色應該要有個正式道別嘅機會，好頭好尾咁完咗佢。我當時係打算繼續拍落去，直至應該停嘅時間為止。」

Johnny Depp亦表達出對於Jack Sparrow呢個角色嘅喜愛：「Jack Sparrow船長呢個角色係我由零建立起黎，而且…你會放好多『自己』入去一個角色。」亦因係多年黎投放好多心機去建立角色，所以當Disney與其切割時，佢感到非常失望：「同呢班人合作咗咁耐，我又重新寫過啲對話、場景、笑話，所以我唔明，大家有段長久又成功嘅關係——至少對Disney而言係啦——點解我會突然之間未審先判畀人話有罪。」

圖片：IMDB

Johnny Depp作供指，當拍完系列第五集後，系列團隊就已經搵佢開始參與第六集嘅劇本，但隨後Amber Heard文章一出，Disney就火速與其切割。

Amber Heard代表律師Benjamin Rottenborn於庭上出示一份英國《Daily Mail》於2018年10月，即Amber Heard文章見街前兩個月嘅報導，當中指Disney因為「財政及個人八卦」問題，決定唔再搵Johnny Depp出演Jack Sparrow一角，試圖解釋Johnny Depp失去角色於Amber Heard篇文無關。而Johnny Depp就表示自己冇為意有件咁嘅事，但就認為「並不出奇」，「當時全世界已經講咗足足兩年，話我打老婆，所以我肯定Disney會為安全起見，嘗試與我切割，當時仲要係 #Metoo風潮最鼎盛嘅時候。」