或者係因為烏克蘭嗰邊毫無進展、俄羅斯政府冇咩好做，所以上個星期，佢哋就公佈一份包括960名美國國民嘅「永久禁止入境俄羅斯名單」。名單上除咗有「合理人選」包括政治人物例如現任總統Joe Biden、副總統Kamala Harris、前總統候選人及國務卿Hillary Clinton之外，仲有幾位較為估唔到嘅人選，包括演員Morgan Freeman，咁多位已經死咗嘅美國參議員。

俄羅斯於上週末發出公告，指出呢個「禁止入境名單」係為咗對應美國對俄羅斯嘅制裁，指出要美國放棄「世界秩序」，認清新嘅地緣現實。又指名單嘅人包括政府官員以及「為佢哋服務嘅人」，認為佢哋有「恐俄症」所以被列入黑名單。當中Morgan Freeeman之所以會上榜，係因為佢曾於2017年為美國政府調查俄羅斯涉嫌干涉2016年總統大選拍攝宣傳片，該片嘅導演Rob Reiner亦同樣被俄羅斯政府列入黑名單。另外Meta創辦人Mark Zuckerberg亦同屬名單之中。

John McCain

圖片：Wikipedia

不過有趣嘅係，俄羅斯嘅960人名單中，有幾個已經不在人世。當中包括曾於2008參選總統、最後敗於Obama手下，並於2018年已經過身嘅共和黨參議員John McCain。McCain於2014年俄羅斯入侵烏克蘭克里米亞地區後，曾多次提倡要協助烏克蘭並制裁俄羅斯。另外傳聞與俄羅斯政府非常親密嘅前美國總統Donald Trump就不在黑名單之上。

資料來源：Deadline