極權國家為咗「維護國家安全」，有時係會做出啲令人難以理解嘅行為。就好似因為入侵烏克蘭而被西方國家制裁嘅俄羅斯咁，早前就因為「反擊」而禁止國民使用IG、FB等「西方國家平台」。而一名IG上有超過50萬Fans嘅俄羅斯時尚網紅，就因為用IG而面臨6年監禁。

在 Instagram 查看這則貼文

VERONIKA L.（@logiinovva）分享的貼文

今日 (9月23日) 生日嘅Veronika Loginova日前於IG發文，話佢於8月17日人在巴黎時，接到媽媽從俄羅斯打黎嘅電話，媽媽話當日有兩個俄羅斯警察上門，宣佈Veronika因為「使用IG」而面臨6年刑期，而且兩名警察仲話Veronika「太出位」。而外媒報導就指Veronika嘅罪名係「吸引人去用Facebook及Instagram」呢項「極端主義行為」。

對此Veronika表示非常愕然：「認真咩？我喎？一個18歲嘅時尚網紅？一個向自己國家交足稅嘅企業家、服裝品牌創辦人？一個平時喺網上分理心理健康雞湯文、從無接觸過任何政治話題嘅人會被人告？係呀，你生活、你影靚相、你幫人都會被人告架，因為你生活喺俄羅斯。」

圖片：logiinovva on IG

因應Facebook及IG母公司Meta早前放寬對俄國士兵嘅「仇恨言論」，所以俄羅斯將兩大社交平台列為「極端主義者」再禁用。不過俄羅斯嘅達官貴人們都係繼續用，當中就包括負責監管新聞言論嘅俄羅斯新聞秘書Dmitry Peskov個老婆。

而面臨禁監，Veronika已經搵咗律師幫手，「唔係講笑，我律師話佢咁耐以黎都未見過啲咁嘅案」，而佢亦爆粗承諾會繼續使用IG更新事情發展：「件事係戇_，而我想所有人都知道發生緊咩事。佢叫我哋唔好講，但我會講。」