SONY次世代遊戲主機PS5推出近兩年，到目前為止仍供不應求(近期情況有所好轉，唔使再抽籤。)，吸引大量黃牛黨搶購及炒賣，令一眾真機迷叫苦連天。究竟炒PS5有幾好賺？最近一位中國藉黃牛商人就向日媒透露，佢喺兩年內賺咗4000萬日元。

據日媒《夕刊富士》報導，一位化名為劉民華嘅45歲女牛黃表示：「經銷商防轉賣措施越嚴厲，我哋(黃牛黨)就越有利可圖。」劉女士指出，目前大部份限量商品都會採用「抽籤」或「排隊拎籌」機制，雖然看似能夠阻止黃牛炒賣，但對於能夠動用大量人力資源（即係搵人頭、排隊黨）嘅黃牛商嚟講，有關措施並唔會構成太大阻礙，反而會令一般買家更難入手，導致商品市場格價上漲，變相令黃牛賺得更多。

另外，即使有部份日本連續電器商規定指定信用卡先能夠買PS5，看似能夠隔絕外國人入手，但劉女士都可以喺網上搵到日本人幫手代買，以原價加1-2萬元日元（約港幣$570-1,130）購入，再以原價2倍賣向中國市場。

以PS5光碟版定價54,978日元（加價前售價，約港幣$3,110）為例，每轉賣一部就約莫賺2,000幾。劉女士就透露呢兩年嚟佢單靠轉賣PS5已經賺咗4000萬日元（約港幣$2,260,000），仲話PS5係歷史上最賺錢嘅轉售商品。