下星期就情人節，相信各位都計劃緊點同另一半慶祝，但如果你嫌又係行街食飯睇戲送禮物好奄悶，咁以下呢個由繩縛師Rika以及Whatever. Coffee舉行嘅「繩人之美繩縛體驗班」，或者就可以為大家嘅情人節，甚至整個拍拖生活帶黎一啲新刺激。

繩縛 「Shibari 縛り」係一種以繩索捆綁於人體身上嘅藝術形式。概念可以追溯自日本古代，武士們用繩綑綁犯人時用嘅「捕繩術」。後來繩縛被加入歌舞伎表演之中，為其注入藝術元素，同時繩縛亦係日本「愛情動作電影」常見元素之一，所以社會普遍亦將繩縛與「色情」拉上關係。

不過著名本地繩縛師Rika就一直希望打破大家對於「繩縛」嘅刻板印象，展示繩縛代表嘅多重意義。繩縛技藝涉及力學、綁法及技巧，旨在牽動感情、抒發各種情感，重點並非為對方帶來痛苦，而在感受情感張力，同時欣賞繩藝的美態。

而Rika創立嘅「繩縛大同」，目前就與位於深水埗大南街嘅Whatever. Coffee合作，舉行「繩人之美」展覽，除咗展出不同繩藝之外，更重要嘅係佢哋會於2月11日舉行「繩人之美繩縛體駭班」，等大家了解繩縛嘅安全及實踐規則、基本繩縛技巧，以及親身體驗傳說中嘅吊綁。

二月繩人之美繩縛體驗班
日期：2月11日（星期六）
時間：下午3時至5時30分
地點：Whatever. Coffee
費用：每位 $500 或兩位 $800

體驗不同綁法及學習有趣的實踐方法，
增加與伴侶的互動，結識有興趣學習繩縛的伙伴。

內容：
安全及實踐規則
基本繩縛技巧
自行練習方法
吊縛體驗