早前羚邦集團除咗引入《The First Slam Dunk》電影之外，更曾經推出充滿紀念性嘅電影主題限量八達通，而睇黎當時嘅銷情應該相當好，因為羚邦似乎會引入更多動漫IP，推出更多限定版八達通。而今個星期，佢哋襯住高橋和希創作嘅《遊戲王》迎來25週年，推出包括特別版八達通在內嘅一系列紀念商品。

呢套「遊戲王特別版八達通」全球限量5,000套，每套均附送印上藍眼白龍嘅收藏盒連獨立序號。而八達通本身就採用海馬瀨人的專用卡牌「藍眼白龍」為主題，用上最經典嘅藍眼白龍繪圖，龍身位置加上閃粉效果，並配上深藍色背景，整體感覺非常有型，而卡背亦印上《遊戲王》卡牌遊戲25週年圖案。套裝內仲有一個以遊戲王卡卡背圖案為主題嘅八達通套，兩者相加就會成為一張完整嘅遊戲王卡牌，Fans們一定愛不釋手。

「遊戲王特別版八達通」將於4月5日起至18日，於Ani-Mall網店以及全港7-Eleven中接受預訂，預計於7月中旬發貨。

而除咗八達通之外，Ani-Mall上亦會推出一系列限量紀念商品，當中必入手包括黃金櫃公仔紙巾套、經典卡背圖設計地墊、遇熱變色陶瓷杯，以及手提包、陶瓷碟、角色立牌及變色匙扣等周邊精品。另外亦會有《遊戲王》各款精選卡牌可供預訂。詳情就要留意Ani-Mall網站啦。

資料來源：Ani-Mall