《The Flash》上映咗足足三個星期，要睇嘅相信都已經睇咗，冇睇嘅相信亦從各方報導中了解到套戲口碑雖然不俗，但票房就極為慘烈嘅事實。但實際上有幾慘烈呢？隨住電影上映進入尾聲，外媒對《The Flash》嘅最終票房能夠作出更準確嘅預測，結果就發現佢唔單會係史上最蝕錢嘅超級英雄電影，更有可能係Warner Bros. 成立100年黎最蝕錢嘅電影。

圖片：IMDB

相信有睇我哋之前報導嘅讀者，應該都知道《The Flash》上映首週北美票房僅得5500萬美金，而次週票房大跌7成只得1500萬，去到第三週更係再跌多六成。票房疲弱嘅結果，就係電影要去上映第19日先突破1億北美票房大關——對比之下，當年《Batman V Superman》嘅首日票房就已經係8400萬。

而海外票房方面亦唔見得有幾好，到目前為止僅收約1.46億。考慮到電影已經上映咗三個星期，票房上升空間極為有限，所以最終全球票房大約會落於2.5至2.6億美金之間。然而電影嘅拍攝成本就已經有2.2億美金、加上全球宣傳約1.5億美金，再扣除與院線之間嘅分成，所以目前估計《The Flash》最終會蝕2億美金。

圖片：IMDB

一套戲蝕2億美金係咩概念呢？首先就會打破今年上映、同屬DC陣營嘅《Shazam 2》創下嘅蝕1.5億紀錄，成為史上最蝕錢嘅超級英雄電影，同時亦會成為Warner Bros.創立100年黎 (今年就係百週年) 最蝕錢嘅電影。另外如果根據Wikipedia上嘅資料，目前荷里活史上蝕得最多嘅電影係2012年由Disney發行嘅《John Carter》，其最差估計就係蝕2億，換言之《The Flash》至少能夠成為「共同冠軍」；即使考慮埋通漲因素，《The Flash》依然穩坐「史上最蝕錢嘅電影」頭六名。

資料來源：The Direct