荷里活名導Martin Scorsese日前為宣傳新戲《Killers of the Flower Moon》而接受《GQ》訪問，當中除咗談到新戲嘅製作過程後，亦提到佢多年黎與荷里活片商、製作人之間嘅「不和」，佢甚至提到過去有多次因為不能忍受片商、製作人嘅粗暴對待，差啲就決定放棄拍戲。

《Casino》劇照

圖片：IMDB

訪問中《GQ》記者Zach Baron指出，縱然Scorsese過去曾拍出N部叫好叫座嘅好電影，但佢似乎一直都與商業為主嘅荷里活格格不入。Scorsese就回憶道：「佢哋 (片方) 有次同我講，我記得應該係《Casino》嗰陣，『我哋票房6000萬，但我哋其實係想有3.6億』。」而拍攝2002年電影《Gangs of New York》嘅時候，佢又同電影製作人Harvey Weinstein (無錯，後來引起 #metoo 浪潮嗰個) 就電影長度及成本展開漫長爭拗：「我意識到，如果要用咁嘅方式拍戲，我就拍唔到落去，我真係要停。因為個結果不令人滿意，而且有時真係極度困難，而我無法生存落去，所以我決定完啦，真係完啦。」

《The Aviator》劇照

圖片：IMDB

但兩年後，佢又因為能夠理解故事主角「Howard Hughes」對於「完美」嘅沉迷，於是同Leonardo DiCaprio合作拍咗《The Aviator》點知套戲嘅發行商又係Havey Weinstein嘅「Miramax」。「我反對架，但我已經被逼去到嗰個位，」Scorsese回憶道：「佢哋都話我被人『搞大咗個肚』，已經冇得走。但拍攝幾順利、剪接又好順利，直到剪接最後幾個星期，佢哋做咗啲我覺得非常刻薄嘅事。」記者Zach Baron補充指，片商Warner Bros. 及發行商Miramax於最後階段停止出資，所以係Scorsese自已拎咗50萬美金出黎完成剪接。

《The Departed》劇照

圖片：IMDB

你以為Scorsese經過兩次不愉快經驗後會「學精」咗？可惜嘅再兩年後佢又遇到個佢好想拍嘅故事，改編自《無間道》嘅《The Departed》，並再次與Leonardo DiCaprio以及，重點，Warner Bros.再次合作。Scorsese指，當年Warner Bros.高層親自去搵佢，希望佢手下留情，唔好「殺死」Leonardo DiCaprio或Matt Damon是但一個角色，「佢哋想要嘅係一個系列 (想拍續集)，而唔係殺唔殺死一個角色嘅道德問題。」而Scorsese最後當然係冇聽Warner Bros.嘅指示，將兩個角色都寫死咗。佢仲記得試映會時，無論觀眾定其他電影人睇完都非常興奮，「就係片方嘅人非常沮喪，因為佢哋唔係想要一部電影，佢哋想要一個系列。咁亦即係代表，我唔可以再喺呢到工作啦。」

資料來源：GQ