雖然話日本寫真文化深厚，但日本傳統價值觀嘅力量更強大，所以一般而言就算係寫真女星，結咗婚之後一係直接引退、一係轉型做其他演藝工作，反正寫真就唔會再係事業重點，結咗婚先黎出道就更加少之少又。但近日，2月先結婚嘅日本名模「古畑星夏」就成為少數之一，決定推出「最初兼最後」一本水著寫真集，究竟係咩原因呢？

現年27歲嘅「古畑星夏」係日本著名時尚模特兒。佢最早於2009年以13歲之齡，從超過1.4萬名參加者中突圍而出，成為日本女中小學生時尚雜誌《nicola》嘅專屬模特兒，2011年7月到11月號創下連續五次成為封面嘅成績，平咗雜誌紀錄。2013年佢從《nicola》畢業，轉投集英社旗下少女雜誌《Seventeen》，2017年再從《Seventeen》畢業，成為相信各位男人老狗都有聽過嘅《ViVi》專屬模特兒一直至今。淨係睇呢個非常簡易嘅履歷，你都知「古畑星夏」就算曾經影為雜誌影過水著專題，佢都係個「時裝界」嘅人。

咁因乜解究佢會結咗婚先黎出水著寫真集呢？據佢近日接受訪問時表示，其實今次寫真集都係同《ViVi》合作，目的就係想證明自己其實都可以性感，唔一定被「時尚模特兒」嘅框架限死。而佢見到有Fans於社交媒體稱佢為「最性感人妻」時，就覺得自己成功咗啦。至於佢個圈外人老公點睇呢？據知老公都係等到寫真集見街先睇到啲相，睇完嘅反應係「太太太性感啦」。睇黎佢呢本「最初兼最後」寫真集相當成功！

IG：starandsummer