由宮崎駿、高畑勳、鈴木敏夫及德間康快等人創辦嘅「吉卜力工作室」歷年黎推出過無數部經典動畫電影，無論係你細個定係你嘅小朋友細個都係睇吉卜力動畫長大。但截自最新《蒼鷺與少年》嘅24部吉卜力動畫當中，日本又覺得邊部先係「最佳」呢？日本《週刊文春》早前就做咗個讀者票選，搵黎超過600名20代-60代選出個人心目中「最佳吉卜力動畫」！

而登上第五名嘅，就係由高畑勳執導，好多人細個睇過一次就唔敢再睇、極為催淚嘅《再見螢火蟲》。日本讀者們認為《再》非常真實地呈現出處於戰爭之中嘅普通人慘況，展現戰爭嘅殘酷與恐佈。唔少年紀較大嘅讀者都指出《再》令佢哋想起從父母口中聽到嘅戰爭故事，並認為電影能夠向遠離戰爭嘅新一代作出警示作用。

第四位，就係曾雄據日本史上最高票房多年，直到2020年先被《鬼滅之刃 無限列車篇》取代，並拎到柏林電影節金熊獎、奧斯卡最佳長篇動畫嘅《千與千尋》。讀者們表示《千》將觀眾帶入一個興奮的異世界，而且千尋從焦慮中成長嘅故事亦令觀眾感到鼓舞及感動。

至於第二名就係吉卜力開山之作 (實際上電影上映日比起吉卜力成立日期更早) 《風之谷》。電影原作為1982年起宮崎駿於《Animage》上連載嘅同名漫畫，而大家熟悉嘅電影版本則於1984年3月上映。上榜原因除咗因為其歷史地位之外，絕大部份人都表示被主角娜烏西卡迷倒。亦有認為《風》係最能表達宮崎駿世界觀嘅作品。

至於榜首、而且係拋離第二名近400分 (票選機制為讀者選出個人頭三名，第一名獲三分、第二名獲兩分，第三名獲一分，再合併計算) 奪冠嘅，就係與《再見螢火蟲》同年上映嘅《龍貓》。值得一提嘅係，如果單論當年上映時嘅票房，《龍貓》喺吉卜力工作室所有作品中最低嘅一部 (與《再》合計11.7億Yen，其上為《天空之城》一部11.6億)，但隨後憑住錄影帶、電視重播等而獲得超高人氣，過去亦曾被多個日本海內外媒體選為「史上最佳動畫」。

而讀者們對於《龍貓》嘅評價，就大多於自己嘅童年回憶，又或者與子女一同觀看嘅回憶有關。似乎代表《龍貓》並不僅為一部好電影，更超出螢幕串連起家庭情懷。

資料來源：週刊文春