睽違12年，《GTA》新作《GTA 6》嘅首條預告，突然提早於香港時間今早發佈。當中除咗見到新世代主機帶來嘅畫面提升之外，更重要嘅就係確認女性主角傳聞。從預告中可見，故事似乎會圍繞一對位於「Vice City」嘅雌雄大盜，而預告亦以女方角度出發，似乎表示會係玩家主要操控嘅角色。

《GTA 6》嘅首條預告，原本係定於美國東部時間12月5日早上9點，即香港時間同時晚上10點先發佈。但或者係因為近日Rockstar某高層兒子於TikTok將遊戲開發畫面泄漏，所以Rockstar突然提早大半日發佈預告。由於故事發生嘅城市「Vice City」係以現實中嘅佛羅里達州邁阿密為藍本，所以從預告中可以見到陽光、海灘、鱷魚、沼澤等邁阿密特色。同時亦非常跟上年代地有手機直播、社交平台嘅畫面出現。

另外，於預告公佈後不久，Rockstar母公司Take-Two亦發佈新聞稿，表示《GTA 6》會有PS5及Xbox Series X/S兩個版本，至於PC版、以及較舊嘅PS4等平台就隻字未提。新聞稿中亦表示《GTA 6》「會係系列中最大、最具沉浸性的進化。」