日本蛋糕販售網站「Cake.jp」過去曾多次與著名動漫合作推出聯乘蛋糕。近來最著名嘅作品，大概就係以「Cake.jp」名物「哈密瓜蛋糕」為藍本、與《ONE PIECE》聯乘嘅「橡膠果實蛋糕」。而近來佢哋又有新作推出，已經仲係同另一日本國民動畫《名偵探柯南》合作——不過個成品呢…睇落都真係有啲粗製濫造…

「哈密瓜蛋糕」

「橡膠果實蛋糕」

雖然過往Cake.jp曾經同《名偵探柯南》合作，推出過三文治、罐頭蛋糕等，但今次就係雙方首次推出「正正經經」嘅蛋糕。造型方面，佢哋選用咗於《柯南》中有重要意義、由黑衣人組織製成、令工藤新一「縮小」成為柯南嘅毒藥「APTX-4689」。實際上就即係一個左士多啤梨慕斯、右乳酪慕斯，入面再分朱古力醬、士多啤梨果醬、士多啤梨啫喱、乳酪慕斯以及海綿蛋糕五層，約22cm X 10cm X 7cm嘅蛋糕。

個蛋糕好唔好食我就唔知，但單憑啲相，都可以睇得出佢嘅造型相當粗糙。明明已經係官方網站嘅圖，但你睇個蛋糕啲紅色出哂界之餘，中間分隔位仲要係唔直嘅，更唔好提佢上面個「APTX-4869」竟然係一張就咁放上去嘅透明膠片。呢個蛋糕賣4,869Yen，即係約HK$268，貴就唔係貴呀，但真係要對《柯南》好有愛先買得落手啦。

資料來源：Cake.jp