歐美版「紅白機」NES上嘅「俄羅斯方塊」雖然已經係1989年推出嘅遊戲，但自推出以來一直都吸引到大量玩家力求打破得分紀錄，甚至到近年都仲有國際性比賽，但其實咁多年黎都冇人真正「打爆」過NES版「俄羅斯方塊」——直到日前一名13歲美國玩家「blue scuti」利用近年研發出嘅「Rolling」技巧，成功到達第157關，令遊戲出現錯誤而「Hang機」為止。

首先，呢到講緊嘅「打爆機」同大家嘅理解可能有啲唔同。NES版俄羅斯方塊中，只要玩家一抵達第29關，方塊下跌嘅速度就會快過一般玩家能夠用原版手掣將方塊左右移嘅速度，亦即必定會輸。所以傳統上會將「方塊於第29關疊到上頂」嘅畫面稱為「Killscreen」。但其實俄羅斯方塊本身並無設定關卡限制，所以只要玩家搵到方法快速按下左右鍵移動方塊，理論上就可以一直玩落去，並追求「因遊戲出錯而無法繼續玩落去」嘅真正「Killscreen」。於是歷年黎就有玩家創出不同嘅按鍵方法，突破第29關之餘，亦將個關數紀錄一直推高。

而到去年12月21日，美國13歲玩家「blue scuti」就成功到達第157關，並令遊戲錯誤地直接讀取沒有程式碼嘅遊戲記憶體，於是成隻Game就直接Hang咗，成為首位達成真正「Killscreen」嘅玩家。如果大家想知更多關於整件事嘅來龍去脈，可以去睇「aGameScout」製作嘅梳關影片。