去年年中荷里活演員工會及作家工會為爭取更高福利而聯合罷工，導致整個荷里活停罷近5個月，最後逼到片方代表AMPTP讓步先最終平息。事隔幾月，荷里活近日又再此醞釀另一場罷工，不過今次發起罷工嘅，就係影視產業中嘅真正幕後工作人員。

圖片：Variety

據外媒報導，今次發起聯合罷工嘅組織為國際舞台從業者聯盟（IATSE）、國際卡車司機兄弟會（Teamsters）等多個工會，具體而言就即係荷里活產業中嘅剪接師、服裝師、電工、水泥工、貨車司機等幕後人員。雖然參與人員唔同咗，不過其訴求同去年嘅演員編劇大罷工其實非常類似，主要都係圍繞勞工嘅退休金及健康保險計劃。另外部份勞工亦關注片方使用AI取代真人勞工嘅問題。

IATSE官網上嘅聯合公告

圖片：IATSE

由美國時間週日起，工會已經組織起聯合遊行試圖對片方施壓。其中主要代表司機等藍領工人嘅Teamsters主席Sean O’Brien言詞最為硬朗，佢於接受訪問時稱：「如果呢啲貪得無厭嘅企業——我唔理係Amazon、Sony、Netflix定Disney，如果佢哋選擇唔回報我哋嘅會員，罷工就係佢哋自己攞黎。我哋會令片方跪地求饒」、「如果你搞X我哋Teamster或者其他工會，大家就係貼身肉搏，你最好戴好個頭盔」。

據IATSE嘅公告，各個工會將會於本週開始與片方分別商討未來幾年嘅新合約。

資料來源：Variety