日本嘅方便鐵路，係吸引大家不停去嘅原因之一。但鐵路網超發達嘅其中一個後果，就係會出現如新宿等超級大、結構超級複雜嘅大站。而且你唔好以為只係遊客先覺得新宿好複雜，其實日本人自己都搞唔清究竟邊個出口打邊個出口。

基本、新宿駅に入ったら出られないよね。新宿駅地下街は人類の第二の故郷となり、人々はそこで子を産み、育て、そして死んでいった。

—  (@DiiElsherif) June 12, 2024

話說日本美術家「星田大輔 @d_hoshida」上個禮拜於個人X（Twitter）上分享咗一個小故事，就係佢喺新宿站遇到一位外國人問佢：「我想出去，請問出口喺邊？」。但問題係星田大輔平時都搞唔清楚究竟點樣離開新宿站，所以佢只好回覆對方「我都唔知」，結果該名外國人就露出非常震驚嘅表情。而呢個看似好簡單嘅帖文，竟然吸引到近千萬次觀看，15.5萬個讚好及2.3萬次轉發，原因就係好多日本人、甚至東京人其實都搞唔清新宿站啲出口喺邊。

圖片：Marc Smith

留言處有大量日本網民分享自己「迷失新宿」嘅經歷。有人表示自己每次去到新宿都唔知點解係由唔同嘅出口出黎；亦有喺東京住咗20年嘅人表示，由於新宿站不停改建、增建，佢都已經搞唔清新宿站嘅結構；有人分享當年就係因為喺新宿站搵唔到出口，結果錯過自己嘅畢業禮；亦有人指自己雖然未試過於新宿站迷路，但要用口教人點離開新宿站又係另一個難度。

最有趣嘅係，開始有人用呢個話題黎寫故。有人笑稱「無幾耐之後，有人會於新宿站發現一組白骨…」，亦有人認真「9噏」：「其實只要進入新宿站就無法再離開，新宿站地下街成為人類第二故鄉，好多人喺入面結婚生仔，住到死為止。」