過去我哋曾經為大家報導過，日本唔少卡牌店因為客人唔沖涼發出惡臭而禁止客人進入、聲優於見面前提醒Fans們要沖涼等新聞，似乎「唔沖涼」就係日本御宅族嘅「特色」之一。不過據早前播出嘅日本節目《行列のできる相談所》，「唔沖涼」其實唔係御宅送「專利」，唔少日本年輕人都表示希望能夠「取消沖涼」。

話說早前播出嘅《行列のできる相談所》，進行咗一個專題，搵黎100名10代至30代日本男女，選出佢哋最想「取消」嘅日常生活習慣。結果發現日本年輕人最想取消嘅生活習慣有「返工」、「吹頭」及「刷牙」（共同第八）、「洗衫」（第七）、「化妝」及「洗碗」（共同第五）、「打掃」（第四）及「讀書」（第三）等，絕大部份都係可以理解，而且唔太會影響到人嘅。但令人震驚嘅係，「沖涼」竟然成為日本年輕人第二想取消嘅生活習慣，僅次於「料理」之後。

據《Pinzuba.news》引用同一個票選結果報導，日本年輕人之所以想「取消沖涼」，主要都係覺得沖涼好麻煩，「一天半日唔沖都冇咩所謂」。有趣嘅係從《Pinzuba.news》選取嘅投票者回應中，似乎可以見到女性受訪者更討厭沖涼；無獨有偶地，《行列のできる相談所》節目中搵黎三女兩男、共5位平均年齡25歲嘅藝人代表，亦係三位女藝人表示「今日不想沖涼」，更提出「唔想整亂頭髮」、「染髮後經常沖涼會好快甩色」等原因。

順提一帶，節目中仲搵黎另外一組平均會齡75歲嘅年長藝人做嘉賓，佢哋對於有咁多年輕人唔想沖涼表示十分驚訝，其中「後藤輝基」反問年輕組：「如果係大叔唔沖涼又得唔得呢？」結果年輕人藝人們立即激動反對。

不過大家又唔需要對「日本妹」產生戒心。事關雖然日本年輕人好想「取消沖涼」，但實際上都係有沖嘅。100名受訪者中有86人表示每日至少沖一次，兩日沖一次嘅人亦有6%，三日或以上先沖一次嘅人只佔8%。

資料來源：Pinzuba.news