雖然講起Casio大部份人都會覺得佢哋係出錶嘅，但其實佢哋當年係出電子計數機起家，直到1974年11月先推出世界首隻全自動電子錶「CASIOTRON」，亦即係話，依家就係Casio整錶嘅五十週年。而為咗慶祝，Casio最近就推出咗一隻戒指手錶，睇落好似好無厘頭？其實背後都有段故架。

呢隻名為CRW-001-1JR嘅戒指手錶，外觀上仿照Casio於1983年開始推出嘅名作G-Shock 5000為藍本，闊度不足2cm嘅錶面上有一個真係可以顯示時間嘅液晶屏幕，而且錶側嘅掣真係撳到落去而且有用，可供用家顯示日期、另一時區時間以及計時，甚至仲有埋背光燈。另外雖然外表睇唔出，但官網表示CRW-001-1JR可以換電，亦能夠做到生活防水。戒指大小方面，原裝內徑為20mm，但亦可透過增加墊片縮少內徑，最細係18mm。售價則為19,800Yen，即HKD$998左右。

至於點解要整隻「戒指錶」呢？原來當年樫尾忠雄創辦Casio後推出嘅第一款產品，係「戒指吸管」，簡單黎講即係一隻附有香煙吸咀嘅戒指。話說戰後嘅日本物資貧乏，就算有錢食煙都希望食到最後一啖先放棄，但如果直接用手拎住支煙，就會因為太熱而無法食到最後，於是樫尾忠雄就諗到「戒指吸管」解決呢個問題。亦正正係因為戒指吸管大受歡迎，令樫尾忠雄賺到第一桶金，往後Casio先可以開發計數機以至電子錶。所以今次推出「戒指手錶」，其實係向公司嘅「功臣」致敬。

資料來源：Casio