以《教父（The Godfather）》系列聞名於世嘅名導演Francis Ford Coppola，今年推出耗資1.3億美金「自己錢」製作嘅《Megalopolis》，但最終票房只有1300萬美金，聽到都覺得心痛又肉痛。不過Coppola導演近日接受外媒訪問時，就話依家拍戲係追求創作自由，所以票房唔好唔會影響佢嘅心情，目前仲計劃開拍兩部新戲。

但另一邊廂，當佢提起叫好叫座、成為經典嘅《The Godfather》系列時，就覺得自己當年做咗咗不良示範，「教壞」往後嘅荷里電影，因而「感到羞愧」，仲要向大家道歉。究竟呢個「不良示範」又係咩呢？

話說《Washington Post》上週刊出與Coppola導演嘅訪問，當中Coppola表示自己已經計劃好未來兩部，亦可能係佢人生最後兩部電影。明年初佢就會飛去倫敦準備開拍《Glimpses Of The Moon》，據報故事會來自美國女作家Edith Wharton於1922年推出嘅同名小說，以及1937年嘅喜劇電影《The Awful Truth》，兩者均涉及離婚、感情破裂等元素。

Coppola導演於訪問中將新戲形容為「奇怪的30年代音樂劇」、「非常突兀的甜點」以及「有很強的舞蹈及音樂劇元素」。同時佢亦指出新戲會採用較為「一般」嘅融資方法，簡單黎講就即係唔再自己獨資製作，而係會申請政府資助等。

而拍完《Glimpses Of The Moon》之後，佢就會著手製作最後一部電影《Distant Vision》。目前關於此戲嘅資料有限，但Coppola導演指會比《Megalopolis》更「有野心」。

訪問當中，Coppola導演亦談到自己嘅經典作品《The Godfather》系列。據佢回憶，當年拍完《The Godfather》之後，其實佢係唔想拍續集。但當時嘅Paramount對佢講：「你研發可口可樂出黎，然後同我講你唔再賣可樂？」無奈之下，Coppola導演只能提出多個佢認為對方一定冇可能答應嘅條件，希望以此脫身，點知對方竟然全數應承。而眾多條件之一，就係續集要叫《The Godfather Part II》。換言之Coppola唔一定反對拍續集，但就一定反對續集個名係就咁加「Part II」、「II」、「2」呢啲數字落去就算。好死唔死嘅係《The Godfather Part II》同樣成為經典，令「Part X」呢種命名方法成為主流。對此Coppola導演表示「就係我呢條友喺電影名中加入數字，我對此感到羞愧，我對唔住大家。」

資料來源：Washington Post