荷里活鍾意翻拍經典電影已經唔算係新聞，但或者係因為翻拍得太多、已經接近「冇貨用」嘅關係，近年出現唔少「撞橋」嘅情況。例如最早由環球影業於1931年推出嘅《科學怪人》，傳聞目前就有三部「翻拍作」正在籌備當中。而最新傳出，由環球影業自家翻拍嘅版本或者係當中最令人「期待」嘅，事關據報佢哋打算拍以BLM（Black Lives Matter）運動為主題嘅《科學怪人》電影，電影中「復活」嘅將係一個黑人青少年。

1931年《科學怪人》海報

據荷里活著名爆料記者Daniel Richtmant近日於其Patreon上報導，環球影業近來打算翻拍自家經典《科學怪人》，並將早年嘅「BLM運動」融入電影當中。據報新版電影將會講述一個黑人青少年被當地警察殺害後，佢媽媽搵到方法復活兒子，換言之電影中嘅「科學怪人」乃係一個黑人，而且電影明顯打算反映美國警察對待黑人青少年嘅手法。

縱然Daniel Richtman嘅消息唔一定準確，而且即使根據佢嘅消息，目前環球影業亦只係內部醞釀緊故事，距離真係開拍應該仲有一大段距離，但單單睇到「BLM+科學怪人」呢個主題，就已經知道電影一定會充滿爭議性。一方面，將黑人青少年變成一隻死而復生嘅怪物，一旦處理不當就好容易會引起支持黑人社群人士，特別係擁有相同立場嘅主流媒體批評；另一方面，近年美國左翼思想消退、右翼思想抬頭，又可能會令唔少人批評電影係將經典「洗黑（Blackwashing）」。反正就係極容易兩邊不討好。

Christian Bale於《The Bride!》嘅科學怪人造型

另外值得一提嘅係，目前荷里活其實仲有兩部《科學怪人》電影正在籌備中。一部係由Guillermo del Toro自編自導，本來由Andrew Garfield主演、近日改為Jacob Elordi主演嘅同名《科學怪人》（Frankenstein）；另一部則係由曾於《The Dark Knight》飾演Rachel Dawes、自身亦係導演嘅Maggie Gyllenhaal執導，搵黎Christian Bale主演嘅《The Bride!》。上述兩部電影都係改編自Mary Shelley嘅原著小說，而且兩部都會於今年內上映。