經典喪屍遊戲《生化危機（Resident Evil/Biohazard）》系列又再拍真人版電影，今次重啟將由《宿劫（Barbarian）》導演Zach Cregger操刀，並強調忠於原作遊戲，希望唔會好似舊版電影咁改到面目全非啦。

Zach Cregger在2022年憑藉《宿劫》一嗚驚人，以獨特敘事手法及出色嘅氣氛營造贏盡口碑，僅400萬美元成本斬獲超過4,500萬票房，成為近年恐怖片佳作之一。而佢嘅最新作《Weapons》亦在內部試映取得極高評價，預計2026年上映。或者係睇中Zach Cregger擅長營造壓迫感，最近有消息指Constantin Film及PlayStation Productions已邀請佢執導及撰寫一部全新《生化危機》電影，而且十畫未有一撇就吸引到四間電影公司爭奪發行權，當中包括Netflix及華納兄弟。

目前對電影所知甚少，幾時開拍、演員陣容通通未知。但據外媒《THR》透露，Zach Cregger嘅改編將會更加忠於原著，回歸1996年初代遊戲恐怖根源。此外，《John Wick 4》編劇Shay Hatten亦會參與擔任電影共同編劇。

講開《生化危機》嘅真人版改編黑歷史真係一匹布咁長，最為人所知當然係由Paul W. S. Anderson執導、以動作冒險為主嘅六部曲，雖然遭到玩家派猛烈抨擊「掛羊頭賣狗肉」，但電影卻在全球大賣，所以長拍長有，6集合共收得13億美元票房。後來Sony喺2021年推出咗部重啟作《生化危機：歡迎來到浣熊市（Resident Evil: Welcome to Raccoon City）》，嘗試還原遊戲一、二代故事，但結果因為設定及角色造型魔改太勁，結過口碑票房雙雙仆直。而Netflix亦喺2022年推出過一套《生化危機》真人劇集，但因為太過劇情設定太過「創新」，獲得一面倒負評，上架一個月就極速腰斬唔續第二季。

唔知今次重啟，可唔可以打破《生化危機》真人版就等於爛嘅魔咒呢？

資料來源：THR