話說任天堂上月公開嘅Switch 2宣傳片入面，其中一幕展示出兩個Joy-Con手掣側放喺枱面，仲好似用鼠咁滑嚟滑去，即刻引起唔少機迷猜測。隨住近日一份專利文件曝光，似乎證實新版Joy-Con真係可以當滑鼠用，以後玩射擊或者戰略遊戲時，大家又多個操控方式喇！

根據一份任天堂在2023年提交，但今年2月6日先正式公開嘅專利文件顯示，新版Joy-Con內建光學感應器，只要將手掣SR/SL按鍵朝下打直擺放，玩家就可以將Joy-Con當成滑鼠使用，而手指及中指則擺放在R/ZR按鍵（左手就係L/SL），對應一般滑鼠嘅左鍵與右鍵。

除此之外，文件更指出玩家可以單獨使用一邊Joy-Con進行滑鼠操作，而另一邊就保持傳統操作模式，亦可以兩邊Joy-Con同時使用滑鼠模式，實現雙滑鼠輸入，為日後遊戲提供更多可能性。

任天堂已確定Switch 2將於今年內正式發售，並會在4月2日舉行Direct活動揭露更多細節，或者到時就會知道新機具體操作方式與硬件規格，以及首發遊戲陣容，各位機迷敬請拭目以待。