《龍珠》中唔少角色都曾經留下令人印象深刻嘅「死亡名場面」，當中最出名嘅當然係阿樂於《撒亞人篇》中被培植人炸死倒地嘅「阿樂之死」。但其實於同一篇中仲有另一位角色獻出咗自己嘅生命，製造咗一個名場面。而只要你擁有由日本「MARUSHIN 丸真株式會社」推出嘅《龍珠》橫須賀刺繡外套，你就可以隨時重現呢個名場面。

呢位角色就係天津飯嘅好朋友餃子。話說於眾人對上比達手下立巴之時，餃子為咗爭取時間、救下天津飯而決定貼喺立巴背上自爆，打算同對方同歸於盡，臨爆前仲眼角含淚地同天津飯深情道別。雖然最後爆完後立巴幾乎毫髮無損，但仍然係整個系列中嘅名場面之一。

而「MARUSHIN 丸真株式會社」推出嘅刺繡外套，就係分別以笛子魔童、金菲利、神龍以及餃子為主題，每個角色外套上都有相關刺繡。而當前三者嘅背上最大嘅刺繡都係角色嘅有型立繪之時，餃子嘅竟然係……

原作漫畫

無錯！就係重現佢貼喺立巴背脊、眼角含淚嘅自爆前一刻。由於呢個選擇太過地獄，加上餃子自爆名場面深入民心，所以呢件刺繡外套嘅設計一公開之後，就引來日本網民熱議，唔少人高呼「好傷心」之餘同時又「有啲想買」。事實上「餃子款」亦係四款外套之中目前唯一賣哂嘅，可見大家對於餃子之死嘅……愛？

而如果你對另外三款有與趣的話，目前sunheart-shop上仍然有售，售價為22,000Yen，即約HK$1,150。

資料來源：Sunheart-shop