熱愛美劇嘅觀眾，相信都唔會對由Warner Bros. Discovery（以下簡稱WB）創立、坐擁《Game of Thrones》、《DC》等大型IP嘅串流平台「Max」感到陌生。但近日WB宣佈「Max」會再次改名，變回2023年棄用嘅「HBO Max」，亦係平台創立15年來第五次改名，改到連WB官方都出文自嘲呀。

於早前嘅《Upfront》發佈會當中，HBO CEO Casey Bloys宣佈「Max」將會重新改名變返做「HBO Max」，其目的係於競爭激烈嘅串流市場中明確品牌價值及定位。去年8月上任嘅HBO Max 首席行銷長（CMO）Shauna Spenley表示：「依家嘅申流服務搞到好似快時尚一樣，所以當我哋思考品牌優勢時，就發現HBO過去50年一直堅持嘅價值先係最終答案。」而HBO及HBO Max內容執行長Casey Bloys亦有相似論調，指出要取代Netflix嘅龍頭位置成本太高，我哋必須接受大多數人都有訂閱Netflix、同時仲可以有訂Amazon Prime，重點在於可以為觀眾提供咩額外價值。」

換言之，就即係WB及HBO內部都知「HBO」創作嘅劇集先係大家訂閱HBO Max嘅主要原因，咁就不如用返HBO Max呢個名直接點出服務價值。

值得一提嘅係，WB串流平台過去曾經多次改名。2010年WB首先推出網絡電視「HBO Go」，然後又於2014年推出集合HBO劇集，以及來自英國BBC等外購內容嘅隨選影片（SVOD）服務「HBO Now」。2020年佢哋將兩者整合成「HBO Max」，然後又於2023年改成「Max」，換言之連埋今次改返做HBO Max，已經係15年來第五次改名。

或者係因為知道自己改名改得太頻繁，所以HBO Max官方近日都不停出Post自嘲。當中包括用Uno中嘅Reverse牌將Max變返做HBO Max；又二創經典嘅蜘蛛俠Meme圖，但改成代表HBO Now、Max及HBO Max嘅三個超人互相指黎指去，甚至仲會去網民討論下方留言。不得不承認的確有助增加記憶點。