《龍珠》嘅歷史悠久，代表相關嘅衍生作品，例如遊戲亦非常多。如果你一個Fans，或者會覺得要同時追N隻Game有啲麻煩，但有好多隻Game就同時亦代表有好多「週年紀念」及相關官方活動。好似近日《龍珠》嘅官方X繼今年2月時嘅「悟基塔」以及「比古洛」真人裝束後，又再次因應手機遊戲週年紀念舉行官方服裝抽獎，今次送嘅係「悟空超級撒亞人」裝以及「全力菲利」裝！

＼ #レジェンズ超な7周年／
ドラゴンボールレジェンズ7周年を祝して【#超サイヤ人孫悟空衣装】【#フルパワーフリーザ衣装】を抽選で各1名様にプレゼント！
１）@DB_official_jp をフォロー
２）この投稿に　 #DragonBall40th をつけてメッセージを引用RP
→【#超サイヤ人孫悟空衣装】… pic.twitter.com/BgnaDIksJO

— ドラゴンボールオフィシャル (@DB_official_jp) July 10, 2025

話說《龍珠》嘅官方X近日為咗慶祝手機遊戲《Dragon Ball Legends》推出七週年，所以再次舉行角色服裝抽獎。而今次要抽嘅服裝來自原作《娜美星篇》最後，首次變身成超級撒亞人嘅悟空對上使出全力嘅菲利一幕。當中悟空嘅服裝採用最經典嘅道袍，但就用上戰鬥中段連底衫都爛埋嘅戰損版本；而菲利嘅「服裝」就試圖還原使用百份百力量、由纖瘦變到好鬼大隻嘅菲利，所以用料非常厚，而且有只露出雙眼嘅高領口及帽。

抽獎期間為即日起至日本時間7月16日晚上23:59分。參加方法係先追蹤《龍珠》嘅官方X、轉發上面個帖文並加上「 #DragonBall40th」標籤，最後再寫明你究竟要「悟空超級撒亞人」裝（#超サイヤ人孫悟空衣装）定係「全力菲利」裝（#フルパワーフリーザ衣装）就得。可惜嘅係得獎者需要係日本居民而且有日本地址，身在其他地方嘅Fans如果想抽就要解決呢個問題啦。