喺數位版及服務型遊戲主導嘅年代，玩家買遊戲好多時只係買咗隻Game嘅「遊玩權」，並非真真正正擁有該遊戲，若然廠商突然話要關閉伺服器，遊戲亦會隨之消失。有見及此，去年有玩家發起「Stop Killing Games」聯署，要求遊戲公司保證即使伺服器關閉，玩家都可以繼續玩到已購買嘅遊戲內容，至今已經有超過130萬人簽名支持。最近《Minecraft》之父Markus Persson（Notch）亦喺社交媒體公開表態支持：「如果買遊戲唔算係真購買，咁盜版都唔算係偷竊。」

事情可以追溯到2023年12月，Ubisoft旗下嘅開放世界線上賽車遊戲《The Crew》無預警地從線上商店下架，並宣布在2024年4月起徹底關閉伺服器。由於呢款遊戲並沒有離線模式，所以伺服器一關，就意味買過呢隻Game嘅玩家，無論係買入實體光碟定數位版，都將無法再遊玩遊戲內容。

呢件事即刻引起廣大玩家不滿，認為遊戲公司隨意下架同關閉伺服器，等同剝奪玩家權益，於是，以YouTuber Ross Scott為首嘅玩家就發起「Stop Killing Games」（下稱SKG）連署，促請各地政府能夠制定有關法律，要求遊戲公司停運官方伺服器後，確保玩家仍然可以繼續玩遊戲，例如提供離線模式，或者容許玩家自建私人伺服器。運動至今已獲超過130萬人連署支持，就連PewDiePie、Asmongold及Elon Musk等名人亦有聲援。

當然，並唔係所以人都支持SKG。其中獨立遊戲開發商Pirate Software就反對呢個運動，認為強制遊戲公司提供離線模式或容許建立私人伺服器會增加開發成本，影響線上遊戲產業生態﹐特別係中小型遊戲公司，可能會因為長期維護伺服器嘅財務壓力，而影響新遊戲開發。結果，選擇站在遊戲公司一方嘅Pirate Software而被玩家們鬧爆，其YouTube頻道亦在兩周內流失超過10萬名訂閱者。

Just verifying that yes, that is what I was talking about.

If buying a game is not a purchase, then pirating them is not theft.

— notch (@notch) July 7, 2025

與此同時，《Minecraft》之父Markus Persson（Notch）亦在X上發文諷刺Pirate Software：「大家好，剛剛放完假返嚟重投遊戲嘅懷抱。等等，點解有個nepo baby（裙帶寶寶）咁強硬嘅？如果買遊戲唔算係真購買，咁盜版都唔算係偷竊。」至於被問到遊戲公司應該點樣妥善關閉線上遊戲時，Notch話應該好似以前啲舊遊戲咁，容許玩家自行架設伺服器，咁即使官方伺服器關閉，玩家都可以繼續玩。