在MCU第六階段首作《The Fantastic Four: First Steps（神奇4俠：英雄第一步）》上映前夕，Marvel Studios主席Kevin Feige日前向傳媒大談MCU未來發展，更透露《Avengers：Secret Wars（復仇者聯盟6：秘密戰爭）》將會「Reset（重置）」整個MCU，Tony Stark及Steve Rogers等經典角色亦唔排除會重新選角。

從2008年《Iron Man》到2019年《Avengers: Endgame》，Marvel Studios透過23部電影創造出一個席捲全球嘅電影宇宙，除咗令Robert Downey Jr.、Chris Evans、Chris Hemsworth成為家喻戶曉嘅明星，更大賺過百億美元電影票房，當中《Avengers: Endgame》一度成為影史上最賣座電影（後來被《阿凡達》重映追上）。然而，隨住多位「元老復仇者」退場，迪士尼為推廣Disney+加大作品產量、觀眾需要做事前功課先跟得上劇情，以及作品質素下滑等多項因素，導致MCU人氣每況愈下，風評及票房都大不如前。唔少以前逢MCU電影必入場支持嘅影迷，都變成「等Disney+上架算數」，甚至連睇嘅興趣都無。

隨住MCU第五階段充滿爭議地完結、第六階段正式開啟之前，Kevin Feige喺上星期五邀請各大傳媒到Marvel Studios辦公室，分享MCU未來一系列計劃，其中就提到2027年上映嘅《Avengers：Secret Wars》將「Reset（重置）」整個MCU，回歸單一時間線，就如同2015年原著漫畫《Secret Wars》將多線故事線與時間線重新整合，為之後由《Thunderbolts*》導演Jake Schreier執導嘅全新《X-Men》電影鋪平道路。雖然官方已確定2000年代及2010年代嘅多位X-Men演員將在《Avengers: Doomsday》回歸，包括「X教授」Patrick Stewar、「磁力王」Ian McKellen、「妖后」Rebecca Romijn、「鐳射眼」James Marsden，但經過《Secret Wars》Reset後嘅全新《X-Men》會為多位X-Men角色重新選角，仲會有首次登上大銀幕嘅變種人角色。最令耐人尋味嘅係，Kevin Feige仲話唔排除未來會為Tony Stark及Steve Rogers等經典角色重新選角，並指出「007」同「superman」都換過演員。

Kevin Feige特別強調，《Secret Wars》所做嘅事而唔係「Reboot（重啟）」，而係「Reset（重置）」，希望大家唔好搞亂。

除此之外，Kevin Feige仲提到早在《Ant-Man and the Wasp: Quantumania（蟻俠3）》之前、正式放棄「康」之前，佢哋已經意識到康唔夠強大，唔似Thanos咁勁，所以喺《Ant-Man and the Wasp: Quantumania》上映前已經搵咗Robert Downey Jr.討論由Dr.Doom接棒嘅可能性。至於新版《Blade》點解遲遲未有進展，Kevin Feige解釋因為劇本未夠好：「我哋唔想淨係俾件皮褸佢著，然後開始四處殺吸血鬼，一定要有獨特嘅元素。」並透露電影曾經有3至4個版本劇本，當中兩個係以歷史時期為背景，但Marvel最終決定選用現代背景嘅劇本。